Жогорку Кеңештин 3 жолку депутаты, Апрель окуясынын "кыймылдаткычы", өткөөл мезгилде ИИМди жетектеген башчы. 61 жашында каза болгон Болот Шердин өмүр баяны

1982-1991-жылдары Кыргыз ССРинин ИИМинин милиция органдарында кызмат кылган. 1994-жылы Талас облусунун Манас райондук эл депутаттарынын Үч-Коргон айылдык кеңешине депутат болгон.

2000-жылдын февралында II чакырылыштагы Кыргыз Республикасынын Жогорку Кеңешинин Эл өкүлдөр жыйынынын депутаты болуп шайланган. 2000-2004-жылдары Жогорку Кеңештин Жаштар иши, спорт, туризм, коомдук бирикмелер жана жалпыга маалымдоо каражаттары менен байланыш боюнча комитетин жетектеген.

2005-жылы Талас шайлоо округу боюнча III чакырылыштагы Жогорку Кеңештин депутаты болуп шайланган. 2006-2007-жылдары Жогорку Кеңештин төрагасынын орун басары болгон.

2010-жылдын Апрель окуясында Убактылуу Өкмөттүн мүчөсү катары Ички иштер министрлигинин кызматын аркалаган. Ушул жерден белгилей кетүү керек, 6-апрель күнү Таласта "Ата Мекен" партиясынын лидерлеринин бири болгон Болот Шердин милиция кызматкерлери тарабынан “мамлекеттик ыңкылап жасоого аракет кылды” деген негизде камакка алынышы окуянын курчуп кетүүсүндө отко май тамызгандай эле таасир эткен. Аны бошотуп алуу үчүн 3 миңдей адам облустук администрацияга бастырып барып, губернаторду барымтага алышкан. "Таласта 6-апрель күнү Болот Шерди бийликтин «желдеттери» кармабаса, балким, төңкөрүш болбой калмак" деген өңдүү пикирлердин жаралышы да жогорудагы окуядан улам келип чыккан. Ушул окуядан кийин Болот Шерниязов Шер Болот деп аты-жөнүн өзгөртүп, жаңы паспорт алганы маалым болгон. Ал бул чечимин "Кыргызда бир салт бар экен, катуу оорудан аман калган адамдын аты-жөнүн өзгөртө турган. Аты-жөнүмдү өзгөртүүгө бул да түрткү болду" деп "Супер-Инфого" берген маегинде түшүндүргөн.

2010-жылдын октябрында "Ата Мекен" социалисттик партиясынын тизмеси боюнча V чакырылыштагы Кыргыз Республикасынын Жогорку Кеңешинин депутаты болуп шайланган. Ошол эле жылы Кыргыз Республикасынын президентинин жарлыгы менен кайра аттестациялоо тартибинде "генерал-лейтенант" наамы ыйгарылган.

2011-жылы президенттин жарлыгы менен III даражадагы мамлекеттик жогорку "Манас" ордени менен сыйланган. Болот Шер мамлекеттик кызматтын II класстагы мамлекеттик кеңешчиси, Эл аралык "Көк-Бөрү" федерациясынын негиздөөчүсү.

Болот Шер 61 жашында каза болду. Буга чейин мурдагы депутат үчүнчү ирет инсульт алып, Улуттук госпиталда жатканы маалымдалган. Саясатчыны акыркы сапарга узатуу зыйнаты 23-июнда Таласта өтөрү маалым болду.