Владимир Путин: "СССРге кирген өлкөлөр андан чыгып жатканда орус элинин жерин белекке алып кетпей, эмне менен келсе, ошол менен кетиш керек эле"

Интернет тармагында Орусиянын президенти Владимир Путиндин "Россия 1" телеканалына берген маегиндеги үзүндү талкууга алынууда. Маек кечээ, 21-июнда көрсөтүлдү. Анда Путин мурдагы СССРдин курамына кирген мамлекеттердин жери орус элине тиешелүү деген маанидеги сөздү айткан. Алып баруучу: "Жакында бизде абдан маанилүү саясий окуя - коронавирус пандемиясы болгон бир нече айдын ичинде алган тажрыйбаларыбызды эске алуу менен акыркы 30 жылдан бери биринчи жолу Конституцияга өзгөртүүлөрдү киргизүү күтүлүүдө. Баш мыйзамга өзгөртүү киргизүүнүн актуалдуулугу мурункудан да жогоруладыбы?", - деген суроо берген.

"Ооба, Орусиянын азыркы Баш мыйзамы өзгөчө мезгилде кабыл алынган. Ички саясий кырдаал курч болуп турганда, танктар парламентти көздөй атып жатканда, Москвада адам өмүрүн алган кагылышуулар болуп жатканда кабыл алынган. Бүгүн Кудайга шүгүр, ички саясий абал туруктуу.

Бирок биздин суверенитетке байланышкан нерсени айтсам, СССРди курууда келишимде андан чыгуу укугу тууралуу жазылган. Бирок чыгуу процесстери жазылбагандыктан суроо жаралат. Эгерде кайсы бир республика СССРдин курамына кирсе, бирок өзүнө салттуу Орусиянын тарыхый аймагын, Орусиянын ири аянттагы жерин алса, андан кийин бул Союздан чыгууну чечсе, өздөрү эмне менен келсе, ошол менен кетишпейт беле. Өздөрү менен кошо орус элинин белегин алып кетпей", - деген Путин.

Ошол эле учурда Орусиянын президенти кайсы республика тууралуу сөз болуп жатканын тактаган эмес.