Сооронбай Жээнбеков Москва шаарындагы Улуу Ата Мекендик согуштагы Жеңиштин 75 жылдыгын майрамдоого арналган иш-чараларга катышат

Кыргыз өлкөсүнүн президенти Сооронбай Жээнбеков Орусия президенти Владимир Путиндин чакыруусу менен 24-июнда Улуу Ата Мекендик согуштагы Жеңиштин 75 жылдыгына арналган иш-чараларга катышат.

Президенттик аппараттын тышкы саясат бөлүмүнүн башчысы Данияр Сыдыковдун билдиришинче, иш сапардын алкагында өлкө башчынын Москванын Кызыл аянтындагы аскер парадына, ошондой эле Кремль дубалындагы белгисиз жоокердин күмбөзүнө гүлчамбар коюу аземине катышуусу пландалган.

"Белгилей кетчү нерсе, 75 жыл мурун ушул күнү - 1945-жылдын 24-июнунда Кызыл аянтта жеңүүчүлөрдүн легендарлуу тарыхый парады болуп өткөн", - деп баса белгиледи Данияр Сыдыков.

Буга чейин Москва шаарында 24-июнда өтүүчү Жеңиш парадына президент Сооронбай Жээнбековдун катышары белгилүү болгон. Ошол эле учурда парадга Кыргыз өлкөсүнүн атынан Улуттук Гвардиянын аскерлери катышары кабарланган.