Өмүрбек Бабанов: "Болот Шер кыргыз элинин башын бириктирип, ар-намыс менен абийирди туу туткан акебиз эле"

Бүгүн, 23-июнда Талас облусунун Манас районуна караштуу Чоң-Капка айылында белгилүү саясатчы Болот Шерди акыркы сапарга узатуу зыйнаты өтүүдө.

Экс-депутат Өмүрбек Бабанов Болот Шердин улуу касиеттери көп болгонун белгиледи.

"Боке кыргыз элинин башын бириктирип, ар-намыс менен абийирди туу туткан акебиз эле. Үзөңгү-Куушту коргогон, Каркыраны айтып чыккан Боке эле. Айласы кеткенде 6-апрелде элибизге эркиндик керек деп күрөшкө аттанган. Анын улуу касиеттери көп. 2010-жылы 6-апрелде Бокемди милиция кызматкерлери башына кап кийгизип алып баратканда бир, эки жолу ургулаган экен. Эки, үч күн өтпөй, Боке ички иштер министри болуп, ошол ургулаган адамдарды кабинетине чакырып, силер буйрукту аткаргансыңар деп аларды каматпай, өстүргөн. Муну менен Боке айкөлдүктү көрсөттү. 2005-жылы мен парламентке депутаттыкка аттанганда, мага устат болгон. Айла жок, кыргыз элинин кабыргасы кайышып турат. Биздин Бокебиз чыныгы эл баатыры. Ал бул наамга ээ болот деп ишенем.

Жакында биз куран окутуп жатканда, Боке коштошкону келген экен... Боке дайыма биздин жүрөгүбүздө болосуз", - дейт Бабанов.