"Ооруп жатканына карабай базарда соода кылып отургандарды милиция менен үйүнө таратабыз, болбосо камайбыз" дейт Балбак Түлөбаев

Бишкек шаардык мэриясынын аппарат жетекчиси Балбак Түлөбаев журналисттердин биринин суроолоруна жооп берип жатып, эл карантиндин эрежелерин сактабай жатат деп нааразы болду. Ал калк арасында ооруга ишенбей, талап кылынган нормаларды сактабай жүргөндөр көп экенине кейиген.

"Азыр базарларда ооруп жатса да соода кылып отургандар бар. Барып "кет, дарылан, ишке чыкпа" десең сен багасыңбы деп жаман көрүшөт. Кийинки аптадан баштап базарларга милиция кызматкерлери менен барып, ооруп жаткандарды аныктап үйлөрүнө жөнөтөбүз. Ага да болбой, кетпейм дегендер болсо камайбыз. Анпесе азыр өзүн гана ойлогондор бар экен, элди да ойлоп коюш керек да канча кишиге жуктуруп жатам деп", - деди Түлөбаев.

Ошондой эле ал июль айынын ортосуна чейин абалды байкап көрүшүп, эгерде оору аныкталгандардын саны азайбаса, шаарды кайрадан карантинге жабуу мүмкүн экенин кошумчалаган.

"Жок дегенде бир аптага жабыш керек болот го, азыркы күчөп жаткан чынжырды үзүшүбүз керек. Эл да бул ооруга олуттуу мамиле жасоо зарылдыгын түшүнсүн", - деди ал.