Москвадагы Жеңиш парадына кайсы өлкөнүн лидерлери катышкан жок? Себептери айтылды

Бүгүн, 24-июнда Москвада Улуу Ата Мекендик согуштагы Жеңиштин 75 жылдыгына арналган парад болуп өттү. Парадга Орусиянын президенти Владимир Путинден тышкары, Беларустун президенти Александр Лукашенко уулдары менен, Казакстандын, Тажикстандын, Молдованын жана башка өлкөлөрдүн президенттери катышты. Ал эми салтанатка чакырылган айрым өлкөнүн лидерлери ар кандай себептерден улам парадга күбө боло алган жок.

Орус басылмаларынын маалыматына ылайык, 5 мамлекеттин өкүлү парадга катышкан жок. Алар:

Кыргыз өлкөсүнүн президенти Сооронбай Жээнбеков. Аны Москвага коштоп баргандардын экөөнөн коронавирус аныкталып, өлкө башчы иш-чарага катышпоо чечимин кабыл алган.

Азербайжандын президенти Ильхам Алиев. Ал өлкөдөгү карантиндин мөөнөтү узартылганына байланыштуу келген эмес.

Армениянын өкмөт башчысы Николь Пашинян, ал өлкөдөгү эпидемиологиялык абалга байланыштуу парадга келген жок.

Түркмөнстандын президенти Гурбангулы Бердымухамедов Москвадан келгенден кийин туулган күнүн обочолонууда өткөргүсү келбей, парадга келүүдөн баш тарткан.

Ал эми Хорватиянын президенти Зоран Миланович учактын бузулуп калганына байланыштуу келген жок.