Шашылыш билдирүү! 26-июндан 28-июнга чейин күтүлүп жаткан туруксуз аба ырайына байланыштуу тоо этектериндеги аймактарда сел жүрүшү мүмкүн

Өлкөдө 26-июндан 28-июнга чейин күтүлүп жаткан нөшөрлүү жаан-чачынга байланыштуу тоолуу жана тоо этектериндеги аймактарда сел жүрүшү мүмкүн. Мындай маалыматты Кыргызгидрометтен билдиришти.

"26-июнда күндүз жана 27-28-июнда өлкөнүн аймагында туруксуз аба ырайы күтүлөт. Мезгил-мезгили менен жаан жаап, күн күркүрөшү, бийик тоолуу райондордо кар жаашы күтүлөт. 27-июнда күндүз жана 28-июнда түнкүсүн кээ бир райондордо жаан-чачын катуу жаашы күтүлөт. Айрым жерлерде мөндүр жаашынын ыктымалы бар. Коопсуздук иш-чараларды сактап, жергиликтүү калктын жана мекемелердин, ишканалардын, уюмдардын күч-каражаттарын тартуу менен арыктарды, суу өткөрүү түтүктөрүн жана дренаждык түйүндөрдү тазалоо иш-чараларын жүргүзүү зарыл. Алдыдагы туруксуз аба ырайы тууралуу калкка уюлдук операторлор аркылуу маалымат жиберилген" , - деп жазылат маалыматта.