Кубатбек Боронов: "Күз, кыш мезгилдеринде оорулуулардын саны жогорулашы ыктымал, биздин медицина ага даяр болушу керек"

Медициналык кызматкерлердин кадрдык резервин түзүү жана аларды тийиштүү окутуу - саламаттыкты сактоо тутуму үчүн маанилүү маселелердин бири. Бул тууралуу премьер-министр Кубатбек Боронов республикалык ыкчам штабдын жыйынында билдирди.

Ал коопсуздук кеңешинин чечимдерин өз мөөнөтүндө жана сапаттуу ишке ашыруунун зарылдыгын белгиледи, анын бир пункту катары медициналык адистердин кадрдык резервин даярдоо маселеси саналат.

"Бүгүнкү күндө саламаттыкты сактоо тутуму Бишкекте коронавирус илдетине чалдыккандардын саны кескин жогорулашынан улам белгилүү кыйынчылыктарга дуушар болууда. Медициналык кызматкерлер күнү-түнү үзгүлтүксүз иш алып барууда. Мындан тышкары акыркы күндөрү ооруга чалдыккан медициналык кызматкерлердин саны өсүүдө. Бул саламаттыкты сактоо тутумунун ишине өз таасирин тийгизүүдө", - деди өкмөт башчы.

Кыска мөөнөттө медициналык билим берүү мекемелеринин кызматкерлеринин, ординатурада жана интернатурада окуп жаткандардын катарынан медициналык адистерди даярдоо милдети коюлган.

Кубатбек Боронов Бишкек жана Ош шаарларында тийиштүү иш алып баруу зарылдыгын баса белгиледи.

"Биздин саламаттыкты сактоо тутумубуз күз, кыш мезгилдеринде оорулуулардын саны жогорулоо ыктымалдыгына даяр болушу керек. Ар бир облуста медициналык кадрлардын резервин даярдоо абдан маанилүү", - деди Боронов.