Бишкекте бейтапты ооруканалар кабыл албай, каза болгон. Бул иш боюнча кызматтык териштирүү жүргүзүлөт

Бишкекте бейтапты ооруканалар кабыл албай, дарыгерлердин жардамына муктаж болгон жаран каза болгон. Бул тууралуу маркумдун жакыны видеокайрылуу жасап, жергиликтүү маалымат каражаттарынын бирине билдирген.

Видеонун автору 22-июндан бери ооруканаларга кайрылганын айтып, инисинин дене табы жогору болгону менен коронавируска тапшырган тесттин жыйынтыгы таза чыгып, бейтапканалар кабыл алышпай койгонун айткан. Кайрылуу жасаган жаран иниси бүгүн, 26-июнда унаада отурган жеринен кайтыш болгонун айтып, коронавирустан башка илдет менен ооруган канча бейтап тиешелүү жардам ала албай, каза болуп жатат деген.

Бул боюнча Саламаттыкты сактоо министрлигинен атайын комиссия түзүлгөнүн, тиешелүү кызматтык териштирүү иштери жүргүзүлгөндөн кийин маалымат берилерин айтышты.