ИИМдин Баңгизаттарды мыйзамсыз жүгүртүүгө каршы күрөшүү кызматынын башчысы Олег Запольский мезгилсиз дүйнөдөн кайтты

Ички иштер министрлигине караштуу Баңгизаттарды мыйзамсыз жүгүртүүгө каршы күрөшүү кызматынын башчысы Олег Запольский мезгилсиз дүйнөдөн кайтты. Маалыматты ИИМдин басма сөз кызматынан тастыкташты.

Ага ылайык, Запольский кечээ, 27-июнда 39 жашында көз жумган. Андан 2 күн мурун ооруп ооруканага жаткырылган.

"Азырынча Запольскийдин өлүмүнүн себеби тактала элек. 23-июнда COVID-19га ПЦР-тест тапшырып, анализи таза чыккан", - дешти ИИМдин маалымат кызматынан.

Запольскийдин өлүмүнүн себебин Саламаттыкты сактоо министрлиги тактап берери, андан кийин кошумча маалыматтар болору айтылат билдирүүдө.

Олег Запольский аталган кызматты 2019-жылдан бери жетектеп келген. Милициянын подполковниги. Буга чейин Баңгизаттарын мыйзамсыз жүгүртүүгө каршы күрөшүү кызматынын башчысынын орун басары, ыкчам-издөө башкармалыгынын башчысы кызматтарын аркалаган.

SUPER.KG порталы Олег Запольскийдин дүйнөдөн кайтканына байланыштуу үй-бүлөсүнө, жакындарына көңүл айтып, кайгысын тең бөлүшөт.