Аялды жерге жаткыра тепкен окуя: Сотко чейинки өндүрүш иши башталды

Социалдык тармактарга жер тилке талаштан улам чыккан чырда эркектин аялды жерге жаткыра тепкендеги видеосу тарап, талкууга алынган болчу. Бул боюнча бүгүн, 28-июнда Чүй ОИИББинин басма сөз кызматынан төмөнкүлөрдү билдиришти. Окуя Аламүдүн районунун Адилет жаңы конушунда болгон.

"Ушул жылдын 26-июнь күнү милиция кызматына Адилет жаңы конушунда коңшулар арасында чыр болуп жатат деген маалымат келип түшкөн. Чакырылган жерге Бишкек шаардык патрулдук милициясы барып, саат 16:00 чамасында 30-35 жаштардагы эки киши 28 жаштагы Б.А. менен анын 47 жаштагы апасы Б.А.нын денесине залал келтиришкенин аныкташкан. Андан кийин алар милиция кызматкерлери барганга чейин белгисиз жакка кетип калышкан", - деп жазылат маалыматта.

Окуя боюнча жабыркаган аял жана анын баласы Аламүдүн РИИБине чала тааныш адамдардын бул кылганы үчүн жоопко тартууну өтүнүп арыз жазышкан.

"Бул факты Кылмыштардын жана жоруктардын бирдиктүү реестрине 119-берене ("майда бейбаштык") менен катталып, сотко чейинки өндүрүш иши башталды. Ыкчам иликтөө иштеринин натыйжасында, бейбаштыкка шектелген 48 жана 38 жаштагы 2 киши кармалып, милиция бөлүмүнө алып келинип, сурак беришти. Алдын ала белгилүү жагдайлар боюнча, тараптар ортосунда жер тилкесин талашуудан улам чыр чыккан. Учурда кылмыштын чоо-жайы толугу менен иликтенип жатат. Тиешелүү болгон соттук-медициналык экспертизалар дайындалды, алардын жыйынтыгына жараша жогоруда суралган адамдарды кармоо маселеси чечилет", - деп билдиришти Чүй ОИИББинин маалымат кызматынан.

ЭСКЕРТҮҮ: Видеодо сөгүнгөн сөздөр бар.