Бишкек шаарында "#Reakция 3.0 Эркиндик" аталышындагы нааразычылык акциясы өтүп жатат (фото)

Бүгүн, 29-июнда Бишкек шаарында "#Reakция 3.0 Эркиндик" аталышындагы нааразычылык акциясы өтүп жатат. Акцияга катышуу үчүн азыркы тапта "Эркиндик" бульвары тарапка 100гө чукул жаран чогулду.

Уюштуруучулардын айтымында, митинг “Маалыматты манипуляциялоо тууралуу” мыйзам долбооруна каршы уюштурулган. Алар алдыда "Эркиндик" бульварынан баштап, парламенттин имаратынын жанына чейин жөө басып барууну пландашууда.

Митингге мурдагы саясатчы Өмүрбек Текебаев дагы келген.

"Мен бул мыйзамга каршымын. Анткени Конституцияга ылайык, бүгүнкү саясий системдин негизинде саясий атаандаштык коюлган. Эгерде сөз эркиндиги болбосо, саясий атаандаштык болбойт. Бүгүнкү бийликтин жасап жаткан иши саясий атаандаштыкка сокку урат", - деди өз сөзүндө Текебаев.

Жарандык коомдун каршылыгына карабай, парламент аталган мыйзам долбоорун 26-июнда үчүнчү окууда кабыл алган. Социалдык тармактардын колдонуучулары бул мыйзам "сөз эркиндигине каршы багытталат" деп нааразы пикирлерин айтышууда.