Президент Жээнбеков: "Кайрадан карантин киргизип, кырдаалды күч менен көзөмөлдөө азырынча зарыл эмес"

Президент Сооронбай Жээнбеков бүгүн, 30-июнда Жогорку Кеңеште өкмөт мүчөлөрү ант бергенден кийин сөз сүйлөдү. Мамлекет башчы эпидемиологиялык кырдаалга токтолуп, дагы да болсо чектөөлөр аркылуу абалды көзөмөлдөөгө мүмкүнчүлүк бар экенин айтты.

"Кайрадан карантин киргизип, кырдаалды күч менен көзөмөлдөө азырынча зарыл эмес", - деп билдирди өз сөзүндө.

Ошол эле мезгилде президент өзгөчө кырдаал режими, карантиндик чектөөлөр алынгандан кийин тескерисинче оору күчөп кеткенин, эрежелерге жоопкерчиликтүү мамиле жасалбай жатканы менен байланыштуу экенин да баса белгиледи.

“Чектөөлөр алынгандан кийин оору күч алып, медицина кызматкерлеринин буга чейинки кылган ишин жокко чыгара турган деңгээлге чейин жеттик. Буга айрым саясатчылардын “оору жок, бул бийликтин саясаты” деген жалган сөзүнө ишенип алган кээ бир мекендештерибиздин ооруга жоопкерчиликсиз мамиле кылуусу негизги себептердин бири. Базарларда, соода борборлорунда жана башка коомдук жайларда адамдар санитардык талаптарды сактабай жүрүүсү күчөдү”, - деди президент.