ИИМдин Баңгизаттарды мыйзамсыз жүгүртүүгө каршы күрөшүү кызматынын башчысы Олег Запольскийди акыркы сапарга узатуу зыйнаты өттү

Бүгүн, 30-июнда ИИМдин Баңгизаттарды мыйзамсыз жүгүртүүгө каршы күрөшүү кызматынын имаратында аталган кызматтын башчысы, 39 жашында мезгилсиз дүйнөдөн кайткан Олег Запольский менен коштошуу зыйнаты өттү. Маалыматты ИИМдин басма сөз кызматынан билдиришти.

Коштошуу зыйнатына ИИМдин жетекчилери, Запольскийдин кесиптештери жана жакындары катышты.

"Запольскийдин кесиптештери аны өз ишине өтө так, кылдат мамиле жасаган адис катары жана ар бир жумушунда адамдык сапатты да бийик алып жүргөнүн эскеришти. Аны акыркы сапарга узатуу күжүрмөн аскерлердин катышуусунда өттү. Биз аны ар дайым эң мыкты жетекчи катары эстеп жүрөбүз", - деп жазылат маалыматта.

Олег Запольскийдин артында аялы жана 2 баласы калды. Ал 27-июнь күнү оорудан улам көз жумган.