"Эпидемиологиялык абал курч! Кошумча даярдалган орундуктар тез эле толуп калды" дейт министрликтин өкүлү

Пневмониянын белгилери бар бейтаптар үчүн даярдалган кошумча орундуктардын көбү бир суткада эле толуп калганын саламаттыкты сактоо министринин орун басары Мадамин Каратаев билдирди. Бул тууралуу ал өкмөт үйүндө өткөн маалымат жыйында айтты.

"Өлкөдө эпидемиологиялык абал курч болууда. Анткени оорунун белгилери байкалган бейтаптар үчүн даярдалган кошумча орундуктар бат эле толду. Мисалы №1 шаардык клиникалык ооруканасында ачылган орундуктар бир күн ичинде толуп калды. Ал эми Урология борборунда 17 гана орундук калды. Баса белгилеп кетүүчү жагдай, Урология борборуна оор абалдагы бейтаптарды кабыл алып, илдети орто болгондор "Ганси" обсервация бөлүмүнө жаткырылат. Бүгүнкү күнгө карата "Гансидеги" 200 орундун 130у толуп калды. Көпчүлүк бейтаптар ал жак алыс, шарт жок деп каршылык көрсөтүп жатышат. Ал жакта бардык шарттар каралганын айта кетейин.

Бүгүн аскердик лицейдин имаратынан 150 орундукту ачуунун үстүндө иштеп жатабыз", - деди ал.

Маалымат жыйында министрликтин өкүлү жарандарга кайрылып, оорулууну бейтапканага менчик унаа менен алып келүү маселесине токтолду.

"Мен буга чейин бейтапты менчик унаа менен ооруканага алып келсе болот дегем. Көбү туура эмес түшүнүп, министрликтин өкүлү айтты, кабыл алгыла деп жатышат. Кененирээк түшүндүрө кетейин, эгерде бейтаптын абалы оор болбосо ооруканага келбей эле, дарыгерден кеңеш алып, үйдө болуңуздар", - дейт Каратаев.