Дээрлик 20 жылдан бери ӨКМда иштеп келген подполковник Мухаметалы Жантаев 43 жашында мезгилсиз дүйнөдөн кайтты

Өзгөчө кырдаалдар министрлигинин алдындагы Кризистик кырдаалдарда башкаруу борборунун Ыкчам чара көрүү башкармалыгынын Бирдиктүү мамлекеттик нөөмөтчү - 112 диспетчердик кызматынын башчысы, подполковник Мухаметалы Жантаев 29-июнь күнү мезгилсиз дүйнөдөн кайтты.

Бул тууралуу ӨКМнын басма сөз кызматынан кабарлашты.

Мухаметалы Жантаев 1977-жылы 14-февралда Жалал-Абад облусунун Чаткал районуна караштуу Шекафтар айылында төрөлгөн. Билими жогорку, 2000-жылы Кыргыз мамлекеттик улуттук университетин аяктаган.

Эмгек жолу:

- 2002-2005-жылдары ӨКМнын алдындагы Өрткө каршы мамлекеттик кызмат башкы башкармалыгынын Токтогул райондук өрткө каршы мамлекеттик кызматынын мамлекеттик өрт көзөмөл тобунда инженер;

- 2005-2013-жылдар аралыгында Чаткал райондук өрткө каршы мамлекеттик кызмат бөлүмүнүн башчысы;

- 2013-2014-жылдары Өзгөчө кырдаалдар министрлигинин алдындагы Өрткө каршы мамлекеттик кызмат агенттигинин материалдык техникалык камсыздоо бөлүмүндө улук инспектор;

- 2014-2017-жылдары ӨКМнын алдындагы Өрткө каршы мамлекеттик кызмат агенттигинин Бирдиктүү нөөмөт диспетчердик кызматынын башчысы;

- 2017-2019-жылдары Өзгөчө кырдаалдар министрлигинин Бишкек шаары боюнча башкармалыгынын Бирдиктүү нөөмөт диспетчердик кызматынын башчысы жана 2019-жылдын сентябрь айынан 2020-жылдын июнь айына чейин ӨКМнын алдындагы Кризистик кырдаалдарда башкаруу борборунун Ыкчам чара көрүү башкармалыгынын Бирдиктүү мамлекеттик нөөмөтчү- диспетчердик кызматынын башчысы милдетин аркалап келген.

SUPER.KG порталынын эмгек жамааты подполковник Мухаметалы Жантаевдин каза болгонуна байланыштуу анын үй-бүлөсүнө жана жакындарына көңүл айтып, аза кайгысын тең бөлүшөт.