"Ар бир куткарылган өмүр үчүн сиздерге таазим". Бүгүн куткаруучулардын кесиптик майрамы

1-июль - Кыргыз Республикасынын куткаруу кызматкерлеринин кесиптик күнү.

Өзгөчө кырдаалдар министри Замирбек Аскаров бул даталуу күн менен куткаруу кызматынын кызматкерлерин куттуктайт деп маалымдашты ӨКМнын басма сөз кызматынан.

'Бүгүнкү күн биз үчүн өзгөчө мааниге ээ. Кыргыз куткаруу кызматынын түзүлгөндүгүнө 29 жыл болду. Бул убакыт ичинде өлкөбүздө кандай гана кырсык катталбасын, эр жүрөк, тайманбас куткаруучуларыбыз эл-жерибизге ак кызматын кылып, өзгөчө кырдаалдардын алдын алуу, калкты табигый жана техногендик апааттардан коргоо боюнча олуттуу жана масштабдуу маселелерди чечип, канчалаган адамдардын өмүрүн, мал-мүлкүн сактап келишүүдө.

Өзгөчө кырдаалдар министрлигинин тарыхында куткаруучулар нечен ирет өздөрүнүн иш билгилигин, кайраттуулугун, анык баатырлыгын, ыкчамдуулугун жана курч мүнөзгө ээ экендигин далилдеп келишкен.

Кырсыкка кабылып, көзү чачырап турган адамдар сиздерден гана жардам күтөт. Анткени алардын өмүрүн сактап калуу сиздердин гана колуңуздардан келерине толук ишенишет. Айрыкча азыркы учурдагы дүйнөлүк пандемияга каршы күрөшүүдө дагы күнү-түнү талыкпай эмгектенип келе жатасыздар. Ар бир куткарылган адамдын өмүрү үчүн сиздерге ыраазычылык билдирип, сыймыктануу менен таазим этем", - дейт Аскаров өз куттуктоосунда.