Депутат Жылдыз Мусабекова ооруп жатканын айтып, элдик штабдан жардам сурады

Жогорку Кеңештин депутаты Жылдыз Мусабекова ооруп жаткандагы видеосун жарыялап, элдик ыктыярдуу штабдан жардам сурады. Өзүнүн билдирүүсүндө ал "таба кылбаңыздар, күлбөңүздөр, жардамыңар керек" деп жазган. Ошондой эле 4-5 күн ооруп, өз алдынча дарылануу аракетин көргөнүн, абалы жакшы болуп калгандай сезилгенин белгилеген.

"Бирок бүгүн такыр тура албай калыптырмын, башым, сөөктөрүм ооруп жатат, бутка туруп басышым да кыйын. "Тез жардамга" чалып чакырсак келишкен жок, өзүм медпунктка бара албайм. Кыздарым жакынкы менчик клиникага барып, укол сайып бергиле деп суранышса баш тартышыптыр. Азыр медиктер деле үйгө келгенден коркуп калышыптыр. Элдик штабдарда дарыгерлер болсо айтыңыздарчы, келип жардам көрсөтүшсө", - деген ал.

Көп өтпөй Индира Куралбекова аттуу интернет колдонуучу: "Биз алгачкы жардамды эл өкүлү Жылдыз Мусабековага көрсөттүк. Абалы бир аз жакшы болуп калгандай болду. Катарыбызга Мамлекеттик чек ара кызматынын аскердик медицина бөлүмүнүн башчысы, врач-хирург Улук Исмаилов кошулду. Калың журт карайлап турганда кызмат кылганга даярмын деп байланышты. Ыраазычылык билдиребиз.
Ынтымак менен жеңебиз. Дарыгерлерди урушпаңыздар, алар жетишпей жатышат", - деп жазган.