Ырчы Анжелика башында турган ыктыярчылар 85 миң доллар каражат топтошту. Ал каражатка кычкылтек концентраторлору алынат

Өлкөдөгү эпидемиологиялык абалга байланыштуу кошумча медициналык жайлар ачылып, медициналык каражаттарга муктаждыктар жаралды. Буга байланыштуу кайрымдуу адамдар өз ыктыярлары менен акча топтоп, саламаттыкты сактоо тармагын керектүү болгон медициналык каражаттар менен камсыз кылууну демилгелеп чыгышты. Алардын катарында ар тармактын өкүлдөрү бар.

Алсак, ырчы Анжелика башында турган ыктыярчылар аз убакыт ичинде 85 миң долларга жакын каражат чогулта алышкан. Бул тууралуу ырчы видео отчёт даярдап, чогулган акча эмнеге жана кайда жумшаларын айтып берген.

Айтымында, топтолгон каражатка кычкылтек концентраторлорун алууга буюртма беришти.

Буга чейин жеке ишкер Адылбек Асанов кычкылтек концентраторлорун алууну демилгелеп, 70 даана жабдыкка буюртма бергенин, буюрса келе жаткан аптада жабдыктар өлкөгө жеткирилерин айткан. Ишкердин демилгесин ырчы Мирбек Атабеков дагы колдоп, үй-бүлөсүнүн атынан эки жабдыкка каражат которгон.