Бишкек шаарында ачылган күндүзгү стационарлардын даректери жана байланыш номерлери

Кечээ, 4-июлда Бишкек шаарынын 4 районунда күндүзгү стационарлар ачылган жана дароо эле бейтаптарды кабыл ала баштаган. Бул тууралуу мэриянын басма сөз кызматынан билдиришкен.

Алар күн сайын саат 08:00дөн 20:00гө чейин иштешет. Пневмония жана курч респиратордук инфекция менен жеңил жана орто абалда ооругандар аталган жайга барып, укол жана тамчылатма дары алса болот.

"Учурда ооруканага жата албай жаткан адамдар өтө көп. Алар оор абалдагы бейтаптардан бошобой жатат. Бирок оорунун алгачкы белгилери байкалган жарандар бар. Үйдө жатып алар оорусун күчөтүп албашы керек. Баары өз убагында медициналык жардам алуусу үчүн шаардык муниципалитеттин күчү менен борбор калаанын төрт районунда стационардык борборлор ачылат. Мында тажрыйбалуу дарыгерлер нөөмөткө туруп, консультация берип, зарыл процедураларды жасашат", - деген өкмөт башчы Кубатбек Боронов.

Өкмөт башчы айткандай, ар бир стационардык борбор 200 орунга эсептелген. Алар күнүнө 4000ден 6000ге чейин адамды тейлешет. Зарыл болгон шартта орундар көбөйтүлөт. Адистер курч респиратордук вирустук инфекциянын, пневмониянын же сасык тумоонун биринчи белгилери пайда болгон жарандарга ушул убактылуу медициналык борборлорго кайрылууну сунушташат. Ар бир борбордун көчмө дарыканалары болот, аларда керектүү дарылар сатылат.