Өкмөт 500 мобилдик кычкылтек концентраторун сатып алды

Өкмөт 500 мобилдик кычкылтек концентраторун сатып алды, алар бүгүн чартердик каттам менен Кытай Эл Республикасынан алып келинди. Бул тууралуу бүгүн, 5-июлда өкмөттүн маалымат кызматынан кабарлашты.

Буга чейин өкмөт тарабынан кычкылтек концентраторлорун жана пульсоксиметрлерди сатып алууга 50 миллион сом бөлүнгөн.

Мобилдик кычкылтек концентраторлорун сатып алуу боюнча сүйлөшүүлөр аптанын башында башталган. Тышкы иштер министрлигинин, Кыргыз өлкөсүнүн Кытайдагы элчилигинин ыкчам ишинин натыйжасында мобилдик концентраторлор кыска мөөнөттө республикага жеткирилди.

Вице-премьер-министр Аида Исмаилова белгилегендей, бүгүн кычкылтек концентраторлорунун биринчи партиясы – 500 даана келди, кийинки 500 даанасы өлкөгө келерки аптада жеткирилет.

"COVID-19 коронавирус инфекциясынын жайылуу шарттарында бүгүн өлкөгө жеткирилген мобилдик кычкылтек концентраторлору өтө зарыл. Кычкылтек концентраторлору көптөгөн жарандарыбыздын өмүрүн сактап калууга жардам берет", - деди Исмаилова.

Вице-премьер-министр белгилегендей, кычкылтек концентраты ыкчам тартипте коронавирус инфекциясынан жана өпкө сезгенүүсүнөн жабыркаган жарандар дарыланып жаткан медициналык мекемелер арасында бөлүштүрүлөт. Жабдуулардын бир бөлүгү COVID-19 жана пневмонияга каршы күрөшүү үчүн ачылган медициналык мекемелерди жабдуу үчүн өлкө аймактарына жөнөтүлөт.