Балбак Түлөбаев дары-дармектин баасын жогорулаткандарга "бул күндөр өткөндө эсептешебиз" деди

Бишкек мэриясынын аппарат жетекчиси Балбак Түлөбаев бүгүн, 5-июлда маалымат жыйын өткөрдү. Анда ал жарандарга кайрылып, интернет айдыңында тарап жаткан дарылоо ыкмаларын колдонбоого, дары каражаттарын өз алдынча ичпөөгө чакырды.

"Бул оор күндөр дагы өтөт. Биз биргеликте ооруну жеңебиз! Биз силерди таштабайбыз! Дагы бир жолу кайрылам, биз баарын көрүп жатабыз. Азыр элдин арыз-муңунан, көз жашынан акча жасаганды токтоткула! Ар кандай имиштерди чыгарып, дарыңарды сатканды токтоткула! Бул күндөр да өтөт, ошондо силер менен эсептешебиз.

Андан көрө элдин жанында болуп, элди колдогула. Убагы келгенде эл силерге рахматын айтат", - деди ал.

Жыйындын соңунда Балбак Түлөбаев пандемия шартында ишке тартылган бардык кызматкерлерге, жумушчуларга ыраазычылыгын билдирди.