Кыргыз Республикасынын Эмгек сиңирген артисти, педагог-балетмейстер Асылбек Бегалиев 87 жаш курагында дүйнө салды

Кыргыз Республикасынын Эмгек сиңирген артисти, педагог-балетмейстер Асылбек Бегалиев 87 жашында дүйнө салды. Бул тууралуу анын жакындары тарабынан маалым болду.

Асылбек Бегалиев 1948-жылы Фрунзе шаарындагы музыкалык-хореографиялык окуу жайына кирген. 1950-жылы окуучу кезинде опера-балет театрында “Чолпон” спектаклинде Саматтын ролун ойногон. Анын кыргыз искусствосуна жана маданиятына сиңирген эмгеги бааланып, Жогорку Кеңештин Ардак грамотасы, Манас-1000 медалы, "Маданияттын мыкты кызматкери", "Баткен облусунун ардактуу атуулу" наамдары ыйгарылган. Кыргыз маданиятын жана көркөм руханий дөөлөтүн өнүктүрүүгө зор салым кошкон көрүнүктүү инсандардын бири.

Асылбек Бегалиев өмүрүнүн акыркы күндөрүнө чейин Мукаш Абдраев атындагы окуу жайында бий сабагынын мугалими болуп иштеген.

SUPER.KG порталы Асылбек Бегалиевдин көз жумгандыгына байланыштуу жакындарына жана үй-бүлөсүнө көңүл айтып, аза кайгысын тең бөлүшөт.