Депутат Төрөбай Зулпукаров: "Курулуп жаткан ооруканаларды чукул арада бүтүрүү - бүгүнкү күндүн талабы"

Жогорку Кеңештин депутаты Төрөбай Зулпукаров Баткен облусунун Кызыл-Кыя шаарындагы жана Ноокат районунун Ынтымак айыл өкмөтүндөгү эки оорукананын курулуш ишинин жүрүшү менен таанышып келди. Маалым болгондой Кызыл-Кыя шаарындагы оорукана “Катар” кайрымдуулук фонду, депутат Төрөбай Зулпукаров жана анын командасы тарабынан Ноокаттагы оорукана “Ассанабил” кайрымдуулук фонду жана Төрөбай Зулпукаров тарабынан курулууда.

Кызыл-Кыя шаарындагы оорукана жакынкы күндөрү медициналык жабдыктар менен койкалар алып келинип пайдаланууга берилсе, Ынтымак айыл өкмөтүндөгү эки кабаттуу оорукананын да имараты дээрлик бүтүп калган. Зулпукаров учурдагы кырдаалды эске алуу менен ишти тездетип, илдетке каршы күрөштү күчөтүү керектигин белгиледи.

Эл өкүлүнүн айтымында COVID-19 илдетине байланыштуу өлкө аймагында курулуп жаткан ооруканаларды тез арада бүтүрүү - бүгүнкү күндүн негизги талабы. "COVID-19 илдети жеке эле бизди эмес, дүйнө жүзүндөгү өнүккөн өлкөлөрдү түйшүккө салып жатат. Ошого карабастан биз дагы бар күчүбүздү жумшап, илдетке каршы аракеттерди көрүүдөбүз. Баарыбыз бул оорудан оолак бололу, аман бололу", - деген Төрөбай Зулпукаров.