Өлкөгө Орусиядан 1 жарым миңдей Кыргыз жараны кайтып келишет. Алар автобус менен жолго чыкканын элчиликтен билдиришти

Бүгүн, 5-июлда Орусиянын Оренбург жана Самара облустарынан жалпы 1 миң 496 Кыргыз жараны өлкөгө жөнөтүлдү. Аларды мекенге кайтарууга 31 автобус уюштурулганын Кыргыз өлкөсүнүн Орусиядагы элчилигинен кабарлашты.

Жүргүнчүлөрдүн арасында кичинекей балдары бар 21 эне, 27 улгайган мекендештер бар. Өлкөгө жиберилгендердин тизмесине Оренбург облусунун Соль-Илецк районундагы лагердеги чатырларда, Самара облусунун “Маштаково” көзөмөл өткөрүү бекетинин жанында топтолгон жарандар кирди.

"Элчилик Орусия тарап менен биргеликте бардык жарандардын ПЦР-тестин акысыз өткөрүү маселесин чечти. Мекендештерибизди өлкөгө кайтаруу үчүн автобустардын ижара акысы республикалык ыкчам штаб тарабынан каржыланды.

Бүгүнкү күнгө карата Орусиядан 14 миң 344 мекендешибиз Кыргыз жергесине кайтты. 57 авиакаттамдар уюштурулган", - дешти мекемеден.

Элчилик Орусияда жүргөн кыргыздарга жумуш табуу боюнча жардам керек болсо, Мамлекеттик миграция кызматынын өкүлчүлүгүнө кайрылууну сунуштайт.
Дареги: Москва шаары, Малая Полянка көчөсү 12а;
Байланыш телефондору: +7 (977) 597 37 03; +7 (901) 706 13 56 (WhatsApp); + 7 (901) 761 11 96; +7 (980) 078 03 32; + 495 780 74 12, + 495 780 74 10, + 495 780 74 12;
Электрондук дарек: predmigration@mail.ru.