Кыргыз өлкөсүнө Орусиядан 963 жаран кайтып келди

Кыргыз өлкөсүнө Орусиядан 963 Кыргыз жараны кайтып келишти. Бул тууралуу республикалык штабдан кабарлашты.

Бүгүн, 6-июлда 20 автобус менен биринчи партияда 963 Кыргыз жараны мекенине кайтып келишти. Ал эми 12 автобус менен 533 адамдан турган колоннанын экинчи партиясы Кыргыз-Казак чек арасына Казакстандын жол полиция кызматынын коштоосу менен келе жатат.

Кыргыз өлкөсү менен Казакстандын тышкы саясий ведомстволору ортосунда Орусиянын Оренбург облусунун Соль-Илецк шаарындагы Кыргыз жарандарын ташып чыгуу үчүн Казакстандын аймагы боюнча транзиттик коридорду берүү жөнүндө жетишилген сүйлөшүүлөр ишке ашты.

Аталган иш-чара Кыргыз Республикасынын президентинин жана өкмөтүнүн чет мамлекеттердеги Кыргыз жарандарын кайтарып келүү боюнча жүргүзүлүп жаткан иштеринин чегинде жүрүүдө.

Кыргыз Республикасынын Тышкы иштер министрлиги Орусиянын аймагындагы Кыргыз жарандарына Орусия-Казакстан мамлекеттик чек араларынын ачылышына чейин ал тарапка каттабай турууларын өтүнөт.