Ысык-Көлдө аңчы бүркүттөр менен тайгандардын көргөзмөсү болду

Чолпон-Ата шаарындагы Чыңгыз Айтматов атындагы “Рух Ордо” маданий борборунда 10-сентябрь күнү аңчы канаттуулар менен тайган иттердин көргөзмөсү болду. Аталган иш-чара “Салбуурун” федерациясы тарабынан уюштурулду. Көргөзмөнүн алкагында жыйын болуп, ага Эл аралык бүркүт менен аңчылык кылуу, жапайы канаттууларды сактап калуу ассоциациясынын өкүлү Гари Тимбрелла жана Катар, Грузия, Түркия өлкөлөрүнөн келген коноктор катышты. “Салбуурун” федерациясынын президенти Алмазбек Акунов: “Иш-чаранын максаты - бүркүт менен аңчылык кылууну жайылтуу. Салбуурун – бул бир гана аңчылык эмес, бул биздин маданий мурастарыбыздын бири”,- деди. Дене тарбия жана спорт агенттиги билдиргендей, бүгүн, 11-сентябрда Чолпон-Ата шаарынын ат майданында бир нече улуттук оюндар менен катар “Салбуурун” фестивалы болот.