Москвалык жаран кыргыз элинин пандемия менен күрөшүүдөгү ынтымагына суктанды

Бүгүнкү күндө өлкөбүз пандемиядан жабыр тартып жаткан учуру. Кыйын кезеңде элибиз бир жакадан баш, бир жеңден кол чыгарып, бири-бирине колунан келген жардамды аябай жаткан кези. Мындай көрүнүш башка улуттагы жарандын суктануусуна арзыганы социалдык тармактарда жазылды. Анда москвалык Вадим Захаряев өзүнүн Фейсбуктагы баракчасына төмөндөгүдөй пикирин калтырган.

"Кыргыз өлкөсүндөгү пандемия боюнча бир канча сөз. Албетте, мени бул оор кырдаалда Кыргыз өлкөсү кандай күрөшүп жаткандыгы таң калтырды. Баары биригип, ар бири колунан келген жардамды көрсөтүүдө. Кимдир бирөөсү стационар үчүн имаратын берсе, кайсы бири азык-түлүк жана даяр тамак-аштарды, башкалары медикаменттерди жана коргонуучу кийимдерди сатып беришүүдө. Үчүнчүсү акча чогултуп, керектүү жабдыктарды арзан баада сатып алууга жана алып келүүгө сүйлөшүүлөрдү жүргүзүүдө. Ал эми кээ бирлери кычкылтек жаздыктарын, концентраторун жана дары-дармектерди акысыз эле берүүдө. Оор кырдаалда дүйнөнүн кайсы гана жеринде болбосун адамдар 100дөн да, 100 миң сомдон да акча чогултушууда.

Кыргыз элинин келечеги чоң. Учурда көмөк көрсөтүп жаткан адамдар бийликке барса, анда мамлекеттин келечеги болот. Болбосо эч нерсе өзгөрбөйт", - деген ал.