"Өксүттүң жанды асылым, олтурам ыйлап шолоктой...". Экс-депутат Алмамбет Шыкмаматов жубайын жоктоду

Экс-депутат Алмамбет Шыкмаматовдун жубайы Жанара Турдакунова 6-июлда пневмониядан көз жумган. Өмүрлүк жарынан айрылган саясатчы жубайына арналган "Кош, жаным, жарым Жанарым" чыгармасын социалдык тармактагы баракчасына жазып, сүрөттөрү менен бөлүштү.

Канатым сынып кайрылды,
Бөлүшөөр барбы кайгымды?
Ажырап калдым жарымдан,
Өмүрлүк жаным, периштем.

Өксүдү жаным, ый толуп,
Санаага баттым ойлонуп.
Жазылган дешет маңдайга,
Башынан баары болжонуп.

Жаш элең, жаным жаш элең,
Баарына өзүң, баш элең.
Асылым сени, жар кылып,
Төрөп берген ата-энең.

Адамдан элең башкача,
Жарашчу сени мактаса.
Ажалды таптың доктурдан,
Болобу баса айтпаса.

Жашап бир келгем жомоктой,
Сен барда баарын тоготпой.
Өксүттүң жанды асылым,
Олтурам ыйлап шолоктой.

Кош жаным, жарым асылым!
Жоготту жүрөк жакынын.
Бүдөмүк болуп алды жак,
Жетпей бир турат акылым.

Өлкөдө март айынан бери коронавирустан 112 адам каза болсо, пневмониядан 268 жаран көз жумган.