"Чалдовар" көзөмөл өткөрүү бекетинде вируска каршы колдонулуучу дарыларды өлкөдөн чыгарып кеткенге аракет кылгандар кармалды

"Чалдовар" көзөмөл өткөрүү бекетинде Mercedes-Benz Sprinter автоунаасынан вируска каршы колдонулуучу медициналык препараттарды өлкөдөн чыгарып кеткенге аракет кылгандар кармалды. Бул тууралуу Финполициядан билдиришти.

Маалыматка ылайык, алар дары-дармектерди алма салынган коробканын астына катып бара жатышкан.

"Финполициянын Жайыл жана Чүй райондук бөлүмүнүн кызматкерлери УКМК жана Мамлекеттик чек ара кызматы менен биргеликте дары-дармектерди мыйзамсыз чыгарып кетүүгө каршы иш-чара өткөргөн. Анда "Чалдовар" өткөрмө бекетинен Казакстандын жараны башкарып бара жаткан Mercedes-Benz Sprinter унаасы токтотулган. Унааны текшерүүгө алганда, алма салынган коробкалардын астынан вируска каршы колдонулуучу эуфиллин дарысынан 520 таңгак жана левомакс препаратынан 460 таңгак табылган. Анын тиешелүү документтери жок болуп чыккан. Бул факты Кылмыштардын жана жоруктардын бирдиктүү реестрине катталып, унаа айып короосуна токтотулду", - деп жазылат маалыматта.