Депутат Тазабек Икрамов коронавирустан айыкканы айтылды

Коронавирус илдетине кабылып, андан дарыланып жаткан Жогорку Кеңештин депутаты Тазабек Икрамов айыгып үйүнө чыкты. Бул тууралуу парламенттин басма сөз кызматынын жетекчиси Ибраим Нуракун уулу социалдык тармактагы баракчасына жазды.

Билдирүүдө Тазабек Икрамов менен бирге депутат Экмат Байпакбаевдин да коронавирустан сакайып чыкканы айтылат.

"Жакында экөө тең каронавирустан сакайып чыгышты. Экмат Байпакбаев эчак сакайган, менин абалымды сурап телефон чалыптыр. Өзү да ооруканадан үйүнө кайтып келиптир. "ПЦР-анализ таза чыкты, иним. "Депутаттар элге жардам бериши керек, элдин арасында болушу керек" деп жазганыңды окудум. Азырынча эшикке чыга албайм. Бирок Сокулук районунда төрт айылдын доктурларына жардамчыларым кол кабыш кылып жатат. Колдон келген жардамдарды берип жатабыз" деген. Тазабек Икрамов да ооруп жатканына карабай, Кызыл-Аскерде күндүзгү стационар ачууга каралашты. Бул экөөнүн депутаттыгы жөнүндө эч нерсе айта албайм, бирок адамкерчилиги бийик экенине кепилдик бере алам.
Азыр пандемия күчөп жаткан маалда депутаттык орунга көзү кызарып, БШКга шашылыш түрдө каттоого туруп жаткан партиялардын катарында жүргөн замандаштарыма ушуну айткым келет: "Депутат болуу оңой, адам болуу өтө кыйын", - деп жазылат билдирүүдө.