Жер жүзүндөгү калктын саны 7 миллиард 800 миллиондон ашты

Жер жүзүндөгү калктын саны 7 миллиард 809 миллион 320 миң 722 адамга жетти. Мындай маалымат германиялык "Stiftung Weltbevölkerung - DSW" (Жер жүзүнүн калкы) фонду тарабынан маалым болгон.

Анда планетанын калкынын саны жыл сайын 82 миллион адамга көбөйүп жаткандыгы айтылат. Бул Германиянын жалпы калкынын санына барабар. Дүйнө жүзүндө ар секундада орто эсеп менен 2ден 6 балага чейин төрөлөт. Аталган фонддун эксперттери калктын санынын көбөйүшүнө айрым өлкөлөрдө пландалбаган кош бойлуулук себеп болуп жаткандыгын айтышкан. Мисалга алсак, Африка чөлкөмүндө бойго бүтүп калуусуна жол бербеген каражаттар бардыгына эле жеткиликтүү эмес. Ар бир аялга орточо эсеп менен 4 бала туура келет. Бириккен улуттар уюмунун болжолдуу изилдөөсүнө ылайык, 2050-жылы бул чөлкөмдө калктын саны 1 миллиард 300 миллион адамдан 2 миллиард 500 миллион адамга жетиши мүмкүн.