Мурдагы вице-премьер Алтынай Өмүрбекова суракка чакыртылышы боюнча үн катты

Кечээ, 10-июлда мурдагы вице-премьер-министр Алтынай Өмүрбекова Финпол тарабынан жүргүзүлүп жаткан иликтөөнүн алкагында суракка чакыртылган. Өзүнүн суракка чакыртылышы жана суракта эмне суроолор берилгендигин ал социалдык тармактагы баракчасына жазды.

"Урматтуу достор! Мени ойлоп тынчсыздангандардын бардыгына рахмат. Баары жакшы, мен сурактан кайтып келдим.

Мага Кытайдын гуманитардык жардамы боюнча бир нече суроо берилди. Мени айыптап, Өмүрбекова дары-дармектерди жана медициналык шаймандарды башка өлкөлөргө саткан деп жаткандарга айткым келет, дал ошол Өмүрбекованын демилгеси менен пандемия учурунда дары-дармектерди жана медициналык багыттагы буюмдарды өлкөдөн алып чыгууга тыюу салуу жөнүндө жарлык чыккан.

Андыктан күнөөлөгөнгө шашпай, маалыматты тактоо керек. Мени таанып-билгендер менден бир мүнөт дагы шек санашкан эмес деп үмүттөнөм жана бул маалыматты бурмалоого аракет кылгандардын өз абийирине койдум. Азыр эң негизгиси - вирусту жеңүү, калган нерселер маанилүү эмес. Өзүңүзгө жана жакындарыңызга кам көрүңүз!", - деп жазган Өмүрбекова.

Алтынай Өмүрбекова 1-апрелде ээлеген кызматынан бошотулган.