Орусиядагы Кыргыз элчилигинде иштегендерге кол салуу болду

Москва шаарынын Ички иштер министрлигинин Башкы башкармалыгы WhatsApp аркылуу Кыргыз өлкөсүнүн Орусиядагы элчилигинин имаратын басып алууга чакырган адамдарды аныктоого багытталган ыкчам тергөө иш-чараларын баштады. Ошондой эле элчиликте иштеген эки жаранга кол салуу болду. Бул тууралуу элчиликтин басма сөз кызматынан билдиришти.

Маалыматка ылайык, Москва шаарынын Якиманка району боюнча Орусиянын ички иштер министрлигинин бөлүмү тарабынан элчиликтин кызматкерлеринин (Н.А. жана С.A.) кызматтык милдеттерин аткарып жаткан учурунда денелерине залал келтирүү фактысы боюнча эки арызы катталды. Ошол себептен Кыргыз өлкөсүнүн жараны Б.А. жана Кыргыз өлкөсүндө төрөлгөн Орусиянын жараны М.А.га карата Орусиянын жазык жана административдик мыйзамдарына ылайык ыкчам тергөө иш-чаралары жүргүзүлүүдө.

Кыргыз өлкөсүнө кайтуу үчүн түзүлүп жаткан тизмеге киргизүү максатында элчиликке кайрылган Кыргыз жарандары тарабынан элчиликтин кызматкерлерин уруп-сабоо, кордоо сыяктуу мыйзамсыз иш-аракеттердин көбөйүп жаткандыгына байланыштуу элчилик дипломатиялык өкүлчүлүктүн имаратынын коопсуздугун бекемдөөнү ниеттенүүдө.

Дүйнө жүзүндө коронавирус пандемиясынын жайылышына жана жарандар туш болгон кыйынчылыктарга карабастан, ар бир адамдын өмүрү, ден соолугу жана ар-намысы кол тийгис жана эң жогорку баалуулук экендигин элчилик баса белгилейт. Ушуга байланыштуу коомдук тартипти бузууга багытталган ар кандай иш-аракеттер, коркутуулар, кемсинтүүлөр, элчиликтин кызматкерлерине карата башка мыйзамсыз аракеттерге жол берилбейт жана ага кескин түрдө бөгөт коюлат.