Орусияда коронавирус инфекциясына каршы вакцина сыноодон ийгиликтүү өткөнү айтылды

Орусияда коронавирус инфекциясына каршы вакцина сыноодон өттү. Изилдөө ийгиликтүү болгонун Иван Сеченов университетинин Трансляциялык медицина жана биотехнология институтунун директору Вадим Тарасов билдиргенин орус басылмалары жазышкан.

Аталган өлкөнүн Саламаттыкты сактоо министрлиги 18-июнда Сеченов университетинде Николай Гамалея атындагы Улуттук эпидемиология жана микробиология илимий борбору тарабынан иштелип чыккан коронавирустук вакцинанын клиникалык сыноолору башталгандыгын маалымдаган.

"Сеченов атындагы окуу жайда дүйнөдөгү биринчи коронавируска каршы вакцина сыноодон ийгиликтүү өттү. Изилдөөгө катышкан ыктыярчылардын биринчи тобу шаршемби күнү, экинчиси 20-июлда үйлөрүнө жиберилет", - деген окуу жайдын директору.

Изилдөөгө катышкан ыктыярчылар эки топко бөлүнүп, анда вакцина биринчи топко азыраак, экинчи топко эки эсе көп берилген. Алгачкы күндөрү жарандардын дене табы көтөрүлүп, андан башка эч кандай терс корсөткүчтөр байкалган эмес.

Ыктыярчылар узак убакыт бою обочолонгондуктан, бул нерсе алардын психологиялык абалына таасирин тийгизип, изилдөө учурунда эмоционалдык стресс күчөгөн. Мындан улам изилдөө жүргүзүүгө психологдор да тартылганы айтылат маалыматта.