Ырчы Дайыр Исмадияров коронавирус инфекциясынын жеңил түрү менен ооруп, илдеттен айыкты

Ырчы Дайыр Исмадияров коронавирус инфекциясын жуктуруп алган. Илдетти жеңген ырчы оору жеңил формада өткөнүн айтат.

"15-июнда оорунун алгачкы белгилери байкалды. Тагыраагы, 1-күнү денем ооруду, курч респиратордук вирустук инфекция же грипп деп ойлодум. Экинчи күнү тамагым кычышып, жөтөлдүм, үчүнчү күнү ал белгилер жоголуп, мурдум бүттү. Төртүнчү күнү жыт, даам сезбей калдым. Бешинчи күнү коронавируска тест тапшырдым. Тесттин жыйынтыгы оору бар экенин тастыктады. Албетте, дүрбөлөңгө түштүм, бирок өзүмдү колго алдым.

Дарылоо 10 күнгө созулуп, үй шартында болду. Дарыгерлер убагы менен келишип, ийне сайып турушту. Илдет жеңил формада өттү. Эч ким менен байланышпаганга аракет кылдым.

Оорунун өзгөчөлүгү бир күнү өзүңдү жакшы сезсең, экинчи күнү кайра ооруп калат экенсиң. Өзүңдү жакшы сезип калганда дароо эле дарылоону токтотпостон, дарыгерлер жазып берген дарылоо курсун аягына чейин жүргүзүү керек экен", - дейт ал.