Казакстандагы пневмониянын көп катталышы коронавируска байланыштуу болушу ыктымал

Саламаттыкты сактоо тармагындагы өзгөчө кырдаалдар боюнча Дүйнөлүк саламаттыкты сактоо уюмунун программасынын башчысы Майкл Райан 10-июлда Женевадагы брифингде Казакстандагы пневмониянын көп катталышы туура эмес диагноздолгон коронавирустун бир формасы болушу мүмкүн экенин айткан.

"Өлкөдө COVID-19 вирусу менен ооругандардын көбөйүшү бул версияны далилдейт", - деди Райан. Ал ошондой эле дүйнөлүк саламаттыкты сактоо уюму Казакстандын бийликтери менен иштешип, бул учурлар коронавирус инфекциясына дал келерин түшүнүш үчүн пневмониясы бар бейтаптардын рентген-сүрөттөрүн изилдеп жатканын билдирди. Алар пневмониянын очогу – COVID-19 вирусунун кесепети деген пикирде болгону менен, уюмдун эксперттери башка версияларды дагы карап чыгууга даяр экенин белгиледи Майкл Райан.