Чек арадан кычкылтек концентраторун, дары-дармек каражаттарын мыйзамсыз алып өтүүгө аракет кылгандар кармалды

Мамлекеттик чек ара аркылуу кычкылтек концентраторлорун жана айрым дары-дармектерди мыйзамсыз алып өтүүгө аракет кылган жарандар кармалды. Бул тууралуу чек ара кызматынын маалымат бөлүмүнөн билдиришти.

Бүгүн, 15-июлда "Ак-Тилек" көзөмөл өткөрүү жайынан коңшу Казакстанга бара жаткан 3 унаа токтотулду. Унааларды текшерүү учурунда салондон катылган жүктөр бар экендиги аныкталган. Тагыраагы, 4 комплект кычкылтек концентраторлору жана дары-дармек (Ингавирин, Ксарелто) каражаттары алынган. Кармалган жүктөр Кыргыз Республикасынын өкмөтүнүн токтомунун негизинде өлкө аймагынан чыгарууга убактылуу тыюу салынган.

Тиешелүү иш-кагаздары толтурулгандан кийин транспорт каражаттарынын айдоочулары кармалып, жүктөр менен биргеликте андан ары териштирүү иштерин жүргүзүү үчүн тиешелүү органдарга өткөрүлүп берилди.