Бир суткада 40 миңге жакын адам вирус жуктуруп алган. Бразилиядагы коронавируска байланыштуу акыркы маалымат

Дүйнө жүзү боюнча вирус көп жуктурган мамлекеттердин ичинен экинчи орунда турган Бразилияда акыркы бир сутка ичинде 39 миң 924 адамдан коронавирус инфекциясы аныкталды. Муну менен өлкөдө вирус аныкталгандардын жалпы саны 1 миллион 966 миң 748 адамды түздү. Бул тууралуу аталган өлкөнүн Саламаттыкты сактоо министрлиги берген маалыматка таянуу менен чет элдик басылмалар жазып чыгышты.

Маалыматта айтылгандай, өткөн суткада 1 миң 233 адам бул илдеттин кесепетинен каза болгон. Бул көрсөткүч менен Бразилияда коронавирустан каза болгондордун жалпы саны 75 миң 366 адамды түздү. Ал эми бул илдетти жеңип чыккандардын саны 1 миллион 200 миңден ашуун.

Бразилияда коронавирус инфекциясы алгачкы жолу 26-февралда катталган. Бүгүнкү күндө вирус эң көп жайылган өлкөлөрдүн ичинен АКШдан кийинки 2-орунда турат.

Буга чейин Бразилиянын президенти Жаир Болсонару да коронавирус жуктуруп алганы маалымдалган болчу.