"Күлкүгө бөлөп турчуңуз, кеттиңиз кайда ыйлатып?". Ырчы Кызсайкал Кабылова дин аалымы Чубак Жалиловго арнап ыр жаздырды

Ырчы Кызсайкал Кабылова өлкөнүн экс-муфтийи Чубак Жалиловго арнап "Атыңыз жашайт" аталышындагы ырын жаздырып, клип тарттырды. Жалиловдун каза болгонун дагы деле оор кабыл алып жатканын айткан ырчы порталыбызга буларды билдирди.

"Устаз Чубак Жалилов менен катышчубуз. Менин турмушумдагы оор күндөрдө мага насаат айтып, көп кеңештерин берди. Ата-энем айтпаган насааттарды айтты. Кыйын учурда дайыма устазга кайрылып турчумун. Ал мени шыктандырып, "чыгармачылыгыңды уланта бер, бирок хижабыңды чечпе" деп айтчу.

Ал эми ыр тууралуу айтсам, "Кыргызстан" деген чыгарма үчүн обон жаздырып жаткам. Обон даяр болгондон кийин эле устазыбыз каза болду. Мындан улам чыгарманы Чубак Жалиловго арнайын деген ой келди. Ырды ыйлап жатып жаздырдым. Клипти дагы көрө албай койдум, дагы деле көз жашым тыйыла элек.

Ырды уккандан кийин устаздын жубайы чалып, ыраазычылыгын билдирди. Мындай адам кайра жаралбайт деп ойлойм.", - дейт ал.

Белгилүү диний аалым, экс-муфтий Чубак Жалилов 11-июлга караган түнү оор абалда ооруканага жеткирилип, саналуу сааттардан кийин пневмониядан улам 45 жашында каза болгон. Өмүр таржымалы тууралуу ушул шилтемени басып өтүп, окуй аласыз.