Өлкөдө пневмония жана COVID-19 илдетине кабылгандар бекер дарылана турганы айтылды

"Кыргыз жарандары үчүн пневмония жана COVID-19 илдети менен ооруган бейтаптарды бекер дарылоо туралуу чечим кабыл алынды". Бул тууралуу Милдеттүү медициналык камсыздандыруу фондунун төрагасынын орун басары Акылбек Калыков брифингде маалымдады.

Коронавирус инфекциясынын жайылышы менен күрөшүү жана анын кесепеттерин жоюуда медицина кызматкерлерди камсыз кылуу үчүн алардын эмгегине акыйкат акы төлөө чечими кабыл алынды. Анда пневмонияны дарылап күндүзгү стационарларда иштеп жаткан дарыгерлерге да компенсациялык төлөөлөр жүргүзүлөт.

Жыл башынан тартып республикалык бюджеттен фонддун бюджетине компенсациялык төлөмдөргө кошумча 233 миллион 700 миң сом бөлүнгөн. Ошондуктан бардык медицина кызматкерлерине, компенсациялык төлөмдөр толук көлөмдө жүргүзүлгөн.

Бардыгы болуп төлөмдөрдү 20 миң 933 медицина кызматкери алышкан, анын ичинде (дарыгерлер - 5 миң 308, орто медперсонал - 9 миң 556, кенже персонал - 3 миң 398, башка медкызматкерлерден - 2 миң 671).

Инфекциянын очогунда иштеген медкызматкерлерге жалпы 503 миллион 600 миң сом өлчөмүндө компенсация төлөндү.