"Реал Мадрид" футболдук клубу мөөнөтүнөн мурда Испания чемпиону болду

Футбол боюнча Испания чемпиондугунун 37-турунун алкагында "Реал Мадрид" клубу өз үйүндө "Вилльяреал" клубун кабыл алды. Оюн 2:1 эсебинде талаа ээлеринин жеңиши менен аяктады.

Бул көрсөткүчү менен атактуу Зинедин Зидандын командасы Ла Лигада (Футбол боюнча Испания чемпиондугу) жалпы 86 упай топтоп, мөөнөтүнөн мурда чемпион болду.

"Бул укмуштуудай сезим. Анткени оюнчулардын жасаган иштери таасирдүү. Менин эмоцияларымды сүрөттөөгө сөз жок. Биз эң мыкты болдук. Мен үчүн бул машыктыруучу катары эң сонун күндөрдүн бири. Чемпиондукту майрамдоо бардыгы үчүн таң калычтуу учур. Биз күйөрмандарыбыз менен бирге болгубуз келет. Бирок алар үйдө болсо дагы бактылуу болушат. Чемпиондор Лигасы бул Чемпиондор Лигасы. Бирок мен бул наамга аябай толкунданып жатам", - деген команданын башкы машыктыруучусу Зинедин Зидан.

"Реал Мадрид" клубу бул көрсөткүч менен өз тарыхында 34-жолу Ла Лиганы жеңип алды. Акыркы жолу бул команда Испания чемпиондугун мындан 3 жыл мурун, тагыраагы 2017-жылы жеңип алган.