Тажикстанда жаңы окуу жылы 17-августта башталары айтылууда

Тажикстанда жогорку окуу жайларда жана мектептерде окуу 17-августта башталат. Бул тууралуу бүгүн, 17-июлда аталган өлкөнүн билим берүү жана илим министри Махмадюсуф Имомзода маалымат жыйында билдиргенин өлкөнүн жергиликтүү басылмалары жазып чыгышты.

Жазылган маалыматка ылайык, мындай чечим коронавируска каршы күрөшүү боюнча республикалык штаб менен болгон кеңешмеде кабыл алынган.

"Студенттер, окуучулар жана мугалимдер коронавирустун кесепетинен графиктен бир аз артта калышкан. Ал эми окуу процессин эки апта эрте баштоонун себеби былтыркы сабактар кайталанат. Андан соң жаңы окуу жылына киришет", - деген билим берүү министри.

Ошондой эле ал эпидемиологиялык кырдаал начарлап кетсе, окуу процесси онлайн режимде ишке ашарын жана ага ылайыктуу программалар иштелип чыкканын кошумчалаган.

Эске салсак, Тажикстанда 27-апрелден баштап мектепке чейинки мекемелер, мектептер каникулга чыккан. Аталган өлкө коронавирус бар экенин расмий түрдө 30-апрелде жарыялаган.