Микрохирург Бакыт Өмүрзаков 60 жашында пневмониядан каза болду

Хирургия илимдеринин кандидаты, микрохирург Бакыт Өмүрзаков 17-июлда дүйнөдөн кайтты. Ал пневмониядан каза болгонун Саламаттыкты сактоо министрлигинен ырасташты.

Бакыт Өмүрзаков 1960-жылы туулган. Ал Улуттук госпиталдын пластикалык, реконструктивдик микрохирургия жана кол хирургиясы бөлүмүндө иштеген. Андан кийин Улуттук педиатрия жана балдар хирургиясы борборунда пластикалык микрохирург болуп иштеген, Эне жана баланы коргоо улуттук борборунун тубаса кемчиликтери үчүн хирургия бөлүмүн жетектеген.

Акыркы жылдары Бакыт Өмүрзаков пластикалык жана эстетикалык хирургия боюнча өзүнүн медициналык борборун жетектеп келген.

SUPER.KG порталынын эмгек жамааты Бакыт Өмүрзаковдун мезгилсиз дүйнөдөн кайткандыгына байланыштуу үй-бүлөсүнүн жана жакындарынын аза кайгысын тең бөлүшүп, терең кайгыруу менен көңүл айтат.