20-июлда жогорку окуу жайга тапшыруунун биринчи туру башталат. Үйдө отуруп окууга кантип тапшырса болот?

Быйылкы окуу жылында абитуриенттерди жогорку окуу жайларга кабыл алуу толугу менен онлайн форматта жүргүзүлөт. Абитуриенттерди окуу жайга кабыл алуунун биринчи туру 20-июлдан 22-июлга чейин уланат.

Билим берүү жана илим министрлиги бул жараянды ишке ашырчу "Абитуриент Online" (www.2020.edu.gov.kg) автоматташтырылган маалыматтык системасын иштеп чыкты.

Бул система абитуриенттерди онлайн кабыл алууда биринчи кезекте пандемия учурунда болочок студенттердин коопсуздугун камсыздайт жана алардын ЖОЖдорго массалык топтолуусуна жол бербейт. Абитуриенттин үйүндө отуруп эле санариптик жол менен ЖОЖго тапшыруусуна жол ачат, кабыл алуунун сапаты жана ачык-айкындуулугу, тазалыгы жогорулайт. Ошондой эле ЖОЖдордун кабыл алуу комиссиясынын иши оптимизацияланат.