Индияда коронавирусту дарылоодо колдонулган фавипиравир препаратынын натыйжасы айтылды

Индияда коронавирус менен жабыр тартып жаткан бейтаптарга карата клиникалык сыноонун 3-фазасынан өтүп жаткан фавипиравир препараты оң натыйжа көрсөттү. Бул тууралуу индиялык "Glenmark Pharmaceuticals" фармацевтикалык компаниясы билдиргенин чет элдик басылмалар жазып чыгышты.

Андагы маалыматка караганда, препараттын клиникалык сыноосунун 3-фазасына 150 бейтап катышкан. Бейтаптардын дене табы, кандагы кычкылтектин деңгээли жана дем алуусу 3 күндүн ичинде калыбына келген. Сыноодо бул препараттын оң натыйжасы башка дарыларга караганда 40 пайызга эрте болгону байкалган.

"Биз фавипиравир препаратынын натыйжасына канааттандык. Ал илдеттин жеңил, орточо оор түрү менен жабыркап жаткан бейтаптардын абалынын жакшыруусуна жана илдеттин курч формасына өтүп кетүүсүн алдын алаарына кепилдик болду", - деген аталган фармацевтикалык компаниянын вице-президенти, доктор Моника Тандон.

Акыркы маалыматтар боюнча, Индияда коронавирусту жуктуруп алгандардын саны 1 миллион 200 миңге жакындап калды. Бул илдеттен 753 миң бейтап айыкса, тилекке каршы 28 миңден ашууну каза болду.