Ырчы Анжелика: "Ак Үйдөгүлөргө кийинки жолугушууга Алтынай Нарбаеваны чакырыңыздар деп айттым"

Президент Сооронбай Жээнбековдун кайрымдуулук менен алектенип жүргөн ыктыярчылар менен жолугушуусу эл арасында кызуу талкуу жаратты. Анда бир топ убакыттан бери күн-түн дебей эл кызматында жүргөн Кыргыз Республикасынын Эмгек сиңирген артисти Алтынай Нарбаева, тамада Эрнест Бөрүбаев жана башкалар чакырылгандардын тизмесине кирбегендиги талкууга жем таштаган.

Иш-чарага чакырылбай калган Алтынай Нарбаева буга таарынбай турганын айтып, маек берген. Анын маегинен кийин ырчы Анжелика социалдык тармактагы баракчасына "мен Ак Үйдөгүлөргө айттым, кийинки жолугушууга Алтынай эжени чакырыңыздар, балким, ал улуулата Гүлшайыр Садыбакасова эжебизди сунуштап, ал барат чыгар" деген билдирүү калтырды. Ырчы айым президент менен ыктыярчылардын жолугушуусуна кимдер катыша тургандыгы тууралуу кабары жоктугун айтат.

"Алтынай апама президент менен жолугушуучулардын тизмесине киргенимди, тизмеде кимдер бар экенин билбей турганымды айтканым бар. Ал "макул, жакшы барып келгиле" деди. Бир мактоо кагазын алган жокпуз, эгерде берсе мен фонддун атын ("Апам жана мен" фонду) атамакмын. 5 жылдан бери "Бактылуу айым" долбоорун алып барып, 8 жылдан бери "Элим, барсыңбы?" фонду менен кайрымдуулук иштерин жасап, 22 жылдан бери чыгармачылык менен алектенип келем.

"Апам жана мен" фондуна азык-түлүккө акча берем деп келип кошулуп калгам. Алтынай эжемди жакшы көрүп, апа деп урматтап келгем. Жакында эле карантинде элге көрсөткөн жардамы үчүн Алтынай эже менен Эрнест Бөрүбаев министрликтен грамота алганда кубанганбыз. Грамотаны "Дордой" соода түйүнүндө иштеген эжелер дагы алган. Биз четте калганбыз.

Мен ажобузга элдин кайрылууларын айтканым үчүн жаман көрүнүп жатамбы? Деги бут тосуулар токтойбу же эмне кылсам деле жемелей бересиздерби? 5 миллион сом чогултуп, 7 облуска керектүү медициналык каражаттарды тараттык. Гүлжигит Калыков алып келген акчаларды Алтынай апамдын жеке өзүнө берип, дайыма жан дүйнөм менен иш жасап келгем. Мындан ары жасаган жакшылыктарымды эч кимге көрсөтпөй тынч жашайын. Бардык фонддон кеттим", - деп жазылат анда.