Бишкек шаарында 30 буу казан кышка даяр

Коммуналдык кызматтар 2020-2021-жылдарга жылытуу мезгилине даярдыктарды көрүп жатышат. Шаар тургундарынын үйлөрүн үзгүлтүксүз жылуулук менен камсыз кылуу үчүн "Бишкекжылуулукэнерго" коммуналдык ишканасы оңдоо-профилактикалык иштерин жүргүзүүдө. Бул тууралуу SUPER.KG порталына мэриядан билдиришти.

Ага ылайык, учурда көмөкчү шаймандар насостор, желдеткичтер, көзөмөлдөп өлчөгөн шаймандар, электр бөлүктөрү ирээтке келтирилип жатат. Ошол эле учурда буу казандардын имараттарында косметикалык оңдоо иштери жүргүзүлүүдө. 22-июлга карата 30 буу казаны даяр болуп, 1 миң 434 метр жылуулук түйүнү оңдолду.

Эскерте кетсек, "Бишкекжылуулукэнерго" коммуналдык ишканасы 624 турак үйдү, 12 саламаттыкты сактоо объектисин, 40 жалпы билим берүү мекемесин, 14 бала бакчаны, 8 жогорку окуу жайларды, 26 башка бюджеттик мекемени жана 193 башка кардарларды камтыйт.