Айсулуу Тыныбекова өмүр бою стипендия алат

Эркин күрөш боюнча дүйнө чемпиону Айсулуу Тыныбекова мамлекет тарабынан өмүр бою стипендия алат. Бул тууралуу SUPER.KG порталына Жаштар иштери, дене тарбия жана спорт боюнча мамлекеттик агенттигинин басма сөз кызматкери Нурпери Садырбекова билдирди.

"Мамлекеттик агенттик буга чейин чоңдор арасындагы олимпиадалык спорттун бардык түрү боюнча дүйнө чемпиондугунан биринчи орунду камсыздагандарга өмүр бою стипендия берүү сунушун өкмөткө жөнөткөн. Ага макулдук берилип, токтом кабыл алынды. Буга чейин өмүр бою стипендия, олимпиада жана паралимпиада оюндарынан орун алгандарга гана берилчү", - деди Нурпери Садырбекова.

Бул стипендияны Айсулуу Тыныбекова учурдагы жетишкендиктери үчүн алып жаткан жана келечекте дагы ала турган стипендиялардын мөөнөтү бүткөндөн кийин алып баштайт. Ал өмүр бою ай сайын 20 миң сом стипендия алары белгилүү болду.

Айсулуу Тыныбекова 2019-жылы Казакстандын Нур-Султан шаарында өткөн эркин күрөш боюнча дүйнө чемпиондугунда алтын медаль тагынган.