Чаектеги сел отуздай үйдүн короосуна, жер төлөсүнө кирди

Бүгүн, 27-июлда Нарын облусунун Жумгал районунда саат 14:30 чамасында жаап өткөн жамгырдын кесепетинен бир нече үйлөрдүн короосун сел каптаганын ӨКМдин маалымат кызматы кабарлады. Ага ылайык, Чаек айыл аймагындагы Май-Кокту, Кашка-Терек тилкесиндеги коктулардан келген сел суулары 25 турак үйдүн короолорун жана 6 турак үйдүн жер төлөлөрүн суу каптаган.

Сел жүргөн жерге Жумгал району боюнча өзгөчө кырдаалдар башкармалыгынын башчысы, Жумгал райондук №43 өзгөчө кырдаалдар башкармалыгынан 20 куткаруучу, жергиликтүү тургундар, 1 жүктөгүч, айыл аймактан 1 жүктөгүч, 1 экскаватор жана суу чарба башкармалыгынан 1 жүктөгүч тартылып, суунун нугун бурушкан.

"Турак үйлөрдүн короолоруна жана жер төлөөлөрүнө кирген сууларды мотопомпанын жардамында сордурушкан. Кеч киргендигине байланыштуу иш-чаралар убактылуу токтотулду. 28-июль күнү тазалоо иштери улантылат. Буга чейин Кыргызгидромет сел жүрүү коркунучу тууралуу шашылыш эскертүү таркаткан", - деп жазылат маалыматта.